Të mërkurën ,më 28 qershor 2017, Kryetarja e Dhomës së Specializuar të Gjykatës Kushtetuese të  Dhomave të Specializuara të Kosovës, gjykatëse An Pauwr-Ford, do të shqiptojë përmbledhjen e aktvendimit në lidhje me kushtetutshmërinë e rregullave të rishikuara të Rregullores së Procedurës dhe të Provave miratuar nga gjykatësit e Dhomave të Specializuara të Kosovës, shkruan arbresh.info.

“Shpallja e vendimit do të bëhet në orën 12:00, në ndërtesën e Dhomave të Specializuara të Kosovës në Hagë,” thuhet në njoftimin për medie të Dhomave të Specializuara.

Kryetarja e Dhomës së Specializuar të Gjykatës Kushtetuese do të lexojë përmbledhjen e aktvendimit në anglisht, shkruan arbresh.info.

Përfaqësuesit e mediave nuk do të kenë mundësinë për të bërë pyetje dhe në ndërtesë nuk do të lejohen kurrfarë pajisjesh apo aparatesh elektronike.

Më 27 mars, Kryetarja e Dhomave të Specializuara të Kosovës i referoi Dhomës së Specializuar të Gjykatës Kushtetuese (DHSGJK), Rregulloren e Procedurës dhe të Provave.

Në një datë të mëhershme, gjatë seancës së parë plenare, gjykatësit e Dhomave të Specializuara të Kosovës kishin miratuar Rregulloren e Procedurës dhe të Provave.

Më 26 prill, DHSGJK-ja konstatoi se nëntë rregulla nuk ishin në përputhje me Kapitullin II të Kushtetutës së Kosovës.

Pas aktvendimit të DHSGJK-së, gjykatësit e Dhomave të Specializuara të Kosovës miratuan rregullat e rishikuara të Rregullores së Procedurës dhe të Provave, të cilat Kryetarja e Dhomave të Specializuara ia referoi DHSGJK-së më 31 maj 2017./arbresh.info/